„Það er gríðarlega mikilvægt að mórallinn sé léttur og jákvæður af því þetta er krefjandi vinna“ : upplifun starfsmanna með aðra fagmenntun en leikskólakennarafræði í tveimur leikskólum

Í þessari ritgerð er sagt frá rannsókn sem gerð var í tveimur leikskólum á höfuðborgarsvæðinu. Leikskólarnir eru í sama sveitarfélagi en með ólíkt rekstrarform, annar er einkarekinn en hinn er rekinn af sveitarfélagi. Markmið rannsóknarinnar var að skoða hver upplifun starfsmanna með aðra fagmenntun en leikskólakennarafræði væri í starfi sínu í leikskóla. Auk þess var tilgangurinn að skoða hvort menntun þeirra nýttist í starfi og hvort kjarasamningar hefðu áhrif á starfsánægju þeirra. Að síðustu var ásetningurinn að skoða hvort leikskólastjórar og yfirmaður leikskólasviðs sveitarfélagsins teldu menntun starfsmanna með aðra fagmenntun nýtast innan leikskólanna. Gögnum var safnað með viðtölum við sex starfsmenn með aðra fagmenntun en leikskólakennarafræði, viðtöl voru tekin við tvo leikskólastjóra og auk þess var tekið viðtal við yfirmann leikskólamála sveitarfélagsins. Helstu niðurstöður rannsóknarinnar benda til þess að starfsmenn með aðra fagmenntun hafi meiri möguleika til starfsframa innan einkarekinna leikskóla sem eykur starfsánægju þeirra. Starfsánægja tengdist félagslegum samskiptum og árangri í starfi, bæði persónulegum árangri og árangri nemendanna. Misjafnt var hvort laun hefðu jákvæð eða neikvæð áhrif á starfsánægju. Álag var almennt talið mikið innan leikskólanna og tengdist það álag að einhverju leyti mannabreytingum. Einnig kom í ljós að starfsaldur starfsmanna með aðra fagmenntun er frekar stuttur innan leikskólanna en það birtist í því að erfiðlega gekk að fá viðmælendur sem voru með 6 ára starfsferil eða lengri. Allir viðmælendurnir töldu að menntun starfsmanna með aðra fagmenntun nýttist í starfi og hefði góð áhrif á starf leikskólanna. Ekki er hægt að alhæfa út frá niðurstöðum rannsóknarinnar en niðurstöðurnar gefa til kynna að starfsmenn með aðra fagmenntun eru ánægðir í starfi í leikskólum en virðast staldra stutt við. Hugsanleg ástæða þess að starfsmenn með aðra fagmenntun starfi stutt í leikskólum gæti verið sú að þeir sækist eftir störfum sem tengjast menntun þeirra